പ്രതീക്ഷ നഷ്ടമായി കോണ്‍ഗ്രസ്: നാലില്‍ മൂന്നിടത്തും ബിജെപി മുന്നേറ്റം; കോണ്‍ഗ്രസിന് തെലങ്കാന മാത്രം

ന്യൂഡല്‍ഹി:നിയമസഭാ തിരഞ്ഞെടുപ്പില്‍ നാല് സംസ്ഥാനങ്ങളിലെ വോട്ടെണ്ണല്‍ അന്തിമഘട്ടത്തിലേയ്ക്ക് എത്തുമ്പോള്‍ കോണ്‍ഗ്രസ് വീണുടയുന്നുവെന്നുറപ്പായി. മധ്യപ്രദേശില്‍ ബിജെപി വന്‍ മുന്നേറ്റം സൃഷ്ടിക്കുമ്പോള്‍ അധികാരത്തിലിരുന്ന രാജസ്ഥാനും ഛത്തീസ്ഗഢും കൈവിടുന്ന നിലയിലാണ് കോണ്‍ഗ്രസ്. തെലങ്കാന മാത്രമാണ് കോണ്‍ഗ്രസിന് ആശ്വസമായുള്ളത്. മധ്യപ്രദേശില്‍ അധികാരത്തുടര്‍ച്ച ഉറപ്പിച്ച ബിജെപി രാജസ്ഥാനിലും ഛത്തീസ്ഗഢിലും കേവല ഭൂരിപക്ഷത്തിലേക്കെത്തി. 230 സീറ്റുള്ള മധ്യപ്രദേശില്‍ 116 സീറ്റാണ് കേവലഭൂരിപക്ഷത്തിന് വേണ്ടത്. ബിജെപി ഇവിടെ 150 സീറ്റുകളില്‍ മുന്നിലാണ്. 
199 സീറ്റുകളില്‍ മത്സരം നടന്ന രാജസ്ഥാനില്‍ ബിജെപി 100 സീറ്റിന് മുകളില്‍ ലീഡ് ചെയ്യുന്നു. കോണ്‍ഗ്രസ് 74 സീറ്റിലും. ബിഎസ്പിയും ഭാരത് ആദിവാസി പാര്‍ട്ടിയും മൂന്നിടങ്ങളില്‍ വീതവും സിപിഎം ഒരിടത്തും ലീഡ് ചെയ്യുന്നു. എട്ടിടത്ത് സ്വതന്ത്രരാണ് ലീഡ് ചെയ്യുന്നത്.
ഛത്തീസ്ഗഢില്‍ എക്സിറ്റ്പോള്‍ പ്രവചനങ്ങള്‍ കാറ്റില്‍ പറത്തി ബിജെപിയുടെ മുന്നേറ്റമാണ്.എന്നാല്‍ 90 സീറ്റുള്ള സംസ്ഥാനത്ത് ബിജെപിക്ക് കേവലഭൂരിപക്ഷം തികയ്ക്കാനായിട്ടില്ല. 46 സീറ്റുകളില്‍ ലീഡ് ചെയ്യുന്ന ബിജെപിക്ക് തൊട്ടുപിന്നില്‍ 40 സീറ്റുമായി കോണ്‍ഗ്രസുമുണ്ട്.
തെലങ്കാനയില്‍ എക്‌സിറ്റ്‌പോള്‍ പ്രവചനം പോലെ ഒരു അട്ടിമറി ഉറപ്പിച്ച നിലയിലാണ് ഫലസൂചനകള്‍. 119 സീറ്റുകളുള്ള തെലങ്കാനയില്‍ കോണ്‍ഗ്രസ് 58 സീറ്റുകളില്‍ മുന്നേറുമ്പോള്‍ ബിആര്‍എസിന് 33 സീറ്റുകളിലേ ലീഡുള്ളൂ. ഏഴിടത്ത് ബിജെപി ലീഡ് ചെയ്യുന്നുണ്ട്. ഒരിടത്ത് സിപിഐയും.